An Kurow (Kurów) usa nga baryo ha Timugan o Salatan-Sinirangan nga Polonya, nahamutang ha butnga han Pulawy ngan Lublin, ha Salog Kurowka. Amo ini an kapital hin bulag nga (gmina) ha sulod han Kondado han Pulawy ngan han Lublin nga Voivodya. An populasyon hini 2782 nga molupyo (sumala hin impormasyon tikang han 2006).
Dida han panahon ha butnga han 1431 ngan 1442 an baryo gintaga-an hin mga katungod hin syudad nga nahabase han Balaod han Magdeburg. Komo pribado nga bungto, nagsirbe ini nga sentro hin panngegosyo hin karaonon para han palibot nga lugar. Pipira nga lugar hin pagproducto hin fur nga leather dinhe gihapon nahimutang. Han ika-16 nga siglo usa ini han mga sentro han mga Polish Brethren, kay damo han mga Polish Brethren kinmada pangukoy. Hin hinayhinay, hangtod han 1660, kasagaran han mga nangungukoy nag-konvertir ngadto ha Arianismo han Polish Brethren.
Tikang hini, an bungto lakip dida han kaagi ngan kasaysayan han bug-os nga rehiyon. Katapos han mga Pagtunga-tunga han Polonya, han 1795, ginkuha ini han Austrya. Han 1809 nagin kabahin ini han Ducado han Warsovia, pero naginkabahin sunod han Ginhadi-an han Polonya han 1815. Dida han Nobyembre nga Rebelyon, han Pebrero han 1831, mayda guti-ay nga Pakig-away ha Kurów nga nahinabo dida, nga diin an mga Polako nga mga pwersa ha ilarom ni heneral Józef Dwernicki nagdaog patok han mga Ruso nga mga pwersa. Katapos han Enero nga Rebelyon, han 1870 nawad-an an bungto han charter han pagkasyudad hini, ngan waray na ini nga status hin paginsyudad mahibalik. Tikang han 1918 nahibalik ini nga kabahin han Polonya.
Dida han Polako nga Gyera Depensiba, ha pagtikang han Gyera Pankalibotan II, han Septyembre 9, 1939, an bungto ginbinombahan han Aleman nga Luftwaffe. Upod han mga nagkaiigo ngan nabungkag in sibilyan nga hospital (may tigaman nga mga pula nga krus), nga diin damo nga biktima nagkamatay. Dida han Gyera, an Alemanya nagtukod hin duha nga trabahoan hin uripon nga kampo han bungto. Han 1942 mayda liwat gamay nga ghetto nga gintukod dida, pero an kadam-an nga mga Polako nga ginpriso dida naka-eskapo ngan nakapalagiw ngan inmapi han mga Home Army nga mga unit nga dida han mga hagrani nga kagurangan.
Upod han mga kiritaon hin turista han bungto amo in simbahan han renasimyento (nga gin-ayad dida han 1692) upod in lubnganan han Zbąski nga pamilya ngan mga iskultura ni Santi Gucci (1587). Kilalado gihapon ini nga amo an lugar nga diin natawo hi heneral Wojciech Jaruzelski.